У гаспадарках раёна корманарыхтоўка пачынаецца на мехдвары.
Сяргей Бункевіч.
Гаспадаркі раёна хутка прыступяць да масавай нарыхтоўкі кармоў. Зараз актыўна вядзецца падрыхтоўка сянажна-сіласных траншэй, падкормка мінеральнымі ўдабрэннямі шматгадовых траў і лугапашавых угоддзяў. Работа кіпіць не толькі на палетках, але і на мехдварах, дзе вядзецца рамонт кормаўборачнай тэхнікі.
У сераду разам з начальнікам інспекцыі Дзяржтэхнагляду Пухавіцкага раёна Дзянісам Шырокім мы наведалі ААТ “Ражджэственскае-агра” і ПСУ “Рудзенскае” ААТ “Мінскметрабуд”. На мехдварах гэтых сельгасарганізацый рамонт кормаўборачнай тэхнікі набліжаецца да завяршэння.
— Усе неабходныя запчасткі мы закупілі ў поўным аб’ёме, — расказвае галоўны інжынер ААТ “Ражджэственскае-агра” Михаіл Шульга. — Плануем хутка завяршыць рамонтныя работы, каб быць гатовымі своечасова пачаць нарыхтоўку кармоў. Адну касілку цалкам адрамантавалі, працягваем рамонт другой. Спадзяёмся, што корманарыхтоўчая кампанія сёлета пройдзе без перашкод.
Бягучым рамонтам тэхнікі ў гаспадарцы займаюцца самі механізатары. Сяргей Бункевіч рамантуе касілку, Іван Бакунчык і Валерый Раўтовіч — свае кормаўборачныя камбайны. Па словах механізатараў, асноўная частка работы зроблена. У бліжэйшыя дні яны завершаць астатнюю і будуць гатовыя да свайго чарговага сезона корманарыхтоўкі.
У ПСУ “Рудзенскае” рамонт двух кормаўборачных камбайнаў завершаны, механізатары праводзяць абкатку тэхнікі. Убіраць зялёную масу будуць Аляксандр Равуцкі і Аляксандр Юдзін. На адвозцы будзе задзейнічаны Мікалай Нікіценка і іншыя вадзіцелі.
Мікалай Нікіценка.
Па словах галоўнага інжынера гаспадаркі Дзмітрыя Савіловіча, рамонт усёй кормаўборачнай тэхнікі набліжаецца да фінішу. Ацэніць работу поле, калі тэхніка выйдзе на першы ўкос.
— Агульная гатоўнасць да кормаўборачнай кампаніі ў нашых гаспадарках складае 80 працэнтаў, — гаворыць Дзяніс Шырокі. — Варта адзначыць СУП “Дукора-агра”, дзе кормаўборачныя камбайны падрыхтаваны на 100 працэнтаў, касілкі — на 90 працэнтаў, граблі — на 95 працэнтаў. Добра справілася з пастаўленай задачай інжынерная служба ААТ “Агра-Абярэг”. У гэтай сельгасарганізацыі гатоўнасць кормаўборачных камбайнаў складае 95 працэнтаў, шыроказахопных касілак і грабляў — 100 працэнтаў. У ААТ “Аграсімвал” кормаўборачныя камбайны падрыхтаваны на 86 працэнтаў, граблі — на 100 працэнтаў, касілкі— на 90 працэнтаў.
Аляксандр Равуцкі.
Інжынерныя службы клапоцяцца і пра збожжаўборачныя камбайны. На палетках цвіце азімы рапс, да яго ўборкі застаецца ўсё менш часу. Звычайна ў кожнай гаспадарцы на ўборцы гэтай алейнай культуры задзейнічаны 2-3 камбайны. Да 29 мая яны павінны быць зняты з захоўвання і падрыхтаваны да бягучага рамонту.
Кацярына ВЕРНІКОЎСКАЯ.
