Сельгасарганізацыі раёна на мінулым тыдні прыступілі да нарыхтоўкі кармоў.
Першымі закладваць сакавітыя кармы ў сянажныя траншэі пачалі ААТ “Зазерка” і “Агра-Абярэг”. На іх рахунку — 950 і 823 тоны сенажу адпаведна.
Зазерскія аграрыі ўжо запоўнілі сянажную траншэю на МТФ “Едліна”. Для забеспячэння гэтага важнага тэхналагічнага працэсу ў гаспадарцы сфарміравана зладжаная каманда. На кормаўборачных камбайнах працуюць Сяргей Дароўскі і Уладзімір Кудзімаў. Зялёную масу з поля на малочнатаварныя фермы на МАЗах возяць Аляксандр Холад, Міхаіл Навіцкі, Андрэй Катлянік і Вячаслаў Бурчыц. Трамбоўка зялёнай масы ідзе кругласутачна. Днём на “Кіраўцы” працуе Сяргей Кашмель, ноччу — Мікалай Кушпет.
З раніцы да вечара на сваіх палях шчыруюць таксама земляробы ААТ “Агра-Абярэг”. Кормаўборачным камбайнам кіруе Фёдар Хадыка. На адвозцы задзейнічаны Уладзімір Рунец, Аляксандр Ладуцька, Мікалай Бязручка і Уладзімір Міхаленя. Днём зялёную масу трамбуе Павел Качын, у начныя змены працуе Васіль Брандт.
— Мы скасілі люцэрну і пашавыя травасумесі. Люцэрна парадавала, спадзяёмся, што нарыхтавалі добрыя і якасныя кармы для нашай жывёлы, — расказвае галоўны аграном ААТ “Агра-Абярэг” Раіса Есімчык. — Сянажную траншэю ў Наваполлі цалкам заклалі. Зараз нашы механізатары працуюць у Азярычыне.
Паралельна ў гаспадарках працягваецца касавіца. Актыўна косяць пашы ў ААТ “Агра-Абярэг” і сельгас-філіяле “Дрычын”. Касіць травы першага ўкосу пачалі адкрытыя акцыянерныя таварыствы “Аграсімвал”, “Індустрыя”, “Зазерка”, “Агра-Абярэг”, “Голацк”, сельгасфіліялы “Дрычын” і “Светлая ніва”, СУП “Дукора-Агра”.
Кацярына ДАБРЫЦКАЯ.