У чаканні канструктыўнага дыялогу

У кожнага з дэлегатаў пятага Усебеларускага народнага сходу ёсць сваё меркаванне аб прыярытэтных тэмах для размовы, свае чаканні ад удзелу ў народным сходзе. Сёння сваімі думкамі дзеліцца дырэктар установы адукацыі «Мар’інагорская СШ №3» Таццяна Лабанава:

— Значнасць Усебеларускага народнага сходу заключаецца, на мой погляд, у магчымасці разам абмеркаваць мэты і прыярытэты фарміравання стратэгіі развіцця краіны.

Выхаванне маладога пакалення, развіццё сістэмы вышэйшай і сярэдняй адукацыі, я ўпэўнена, таксама будуць на парадку дня ўсенароднага форуму, бо адукацыя — адзін з прыярытэтаў дзяржаўнай палітыкі.

 Мне, як прадстаўніку сферы адукацыі, хацелася б, каб па-за ўвагай не засталіся надзённыя праблемы педагогікі, звязаныя з роляй настаўніка, яго магчымасцю якасна арганізоўваць працэс навучання школьнікаў. Не сакрэт, што сёння настаўнікі часам загружаны і не звязанымі з прафесійнай дзейнасцю абавязкамі. 

Вельмі хацелася б пачуць і пра тое, як у далейшым будуць вырашацца пытанні прафесійнай падрыхтоўкі кадраў: выходзяць на заслужаны адпачынак ветэраны педагагічнай працы, і змена ім павінна быць якаснай. Пагадзіцеся, што ад таго, хто стаіць ля класнай дошкі, залежыць будучыня нашай краіны.

OLYMPUS DIGITAL CAMERA

Менавіта па гэтай прычыне чакаю, што будуць падняты пытанні і аб сацыяльнай абароне настаўнікаў (узроўні зарплат і забеспячэнні жыллём маладых спецыялістаў). Вельмі важна, каб моладзь была матывавана працаваць у школах, а не шукаць для сябе іншую працу. 

Я чакаю адкрытага, канструктыўнага дыялогу, абмену думкамі, ідэямі. Веру, што ў зале збяруцца людзі, якія маюць актыўную жыццёвую пазіцыю, хварэюць за агульную справу і гатовы не толькі адкрыта гаварыць аб праблемах, але і прапаноўваць шляхі іх вырашэння.

Запісала  Алена  ШАНТЫКА