У раёне працуе грамадская прыёмная: З увагай да кожнай прапановы
Адным з месцаў, куды грамадзяне могуць звярнуцца са сваімі прапановамі наконт змяненняў і дапаўненняў Канстытуцыі Рэспублікі Беларусь, развіцця рэгіёна, з’яўляецца грамадская прыёмная, дзе згодна са складзеным графікам працуюць прадстаўнікі грамадскіх арганізацый. І жыхары нашага раёна карыстаюцца магчымасцю пакінуць свае прапановы, погляды на сітуацыю ў рэспубліцы і ў раёне.
— Падчас майго дзяжурства ў грамадскай прыёмнай патэлефанаваў жыхар вёскі Цітва, — расказала галоўны бухгалтар раённай арганізацыі грамадскага аб’яднання “Беларускі рэспубліканскі саюз моладзі” Святлана Зубарэвіч. — У нас адбылася даволі доўгая размова, падчас якой грамадзянін выказаў нямала цікавых прапаноў.
Па-першае, ён сказаў, што будзе правільна, калі ў артыкул 32 Канстытуцыі, дзе гаворыцца пра тое, што сям’я — гэта саюз мужчыны і жанчыны, дабавяцца словы “па нараджэнні”. А вось з артыкула 45, на яго думку, трэба ўбраць словы аб тым, што грамадзяне абавязаны прымаць меры па зберажэнню і ўмацаванню свайго здароўя. Дарэчы, гэты дадатак прыцягнуў да сябе ўвагу нашых грамадзян і сапраўды выклікае спрэчкі.
Яшчэ мой суразмоўца лічыць, што ёсць неабходнасць больш дасканала прапрацаваць пытанне аб абароне персанальных дадзеных. А ў паўсядзённым абыходзе адмяніць практыку, калі пры ўладкаванні чалавека на працу адзін кіраўнік прадпрыемства тэлефануе другому, каб атрымаць прыватную інфармацыю, якая не прапісана ў афіцыйных дакументах. Пухавіччанін упэўнены, што ўся патрэбная інфармацыя, на падставе якой можна зрабіць пэўныя высновы аб чалавеку, знаходзіцца ў яго працоўнай кніжцы: дзе працаваў, колькі разоў мяняў месца працы, якія мае ўзнагароды альбо вымовы.
Яшчэ ён староннік таго, каб грошы, якія чалавек уносіць ў фонд сацыяльнага страхавання на выплату пенсіі, у выніку ранняй смерці перадаваліся ў спадчыну нашчадкам.
Былі прапановы і меркаванні наконт іншых праблем. Усе яны зафіксаваны і будуць разглядацца.
Грамадская прыёмная працягвае сваю работу. Кожны, хто мае прапановы наконт змяненняў і дапаўненняў Канстытуцыі Рэспублікі Беларусь можа альбо звярнуццаа асабіста, альбо патэлефанаваць.
Наталля ВАСІЛЬЕВА.