Прайшоў трэці этап Кубка РБ па спартыўным скалалазанні.
Пухавіччына паступова становіцца адной з пляцовак для правядзення рэспубліканскіх спаборніцтваў па спартыўным скалалазанні. У кастрычніку лепшыя спартсмены краіны сабраліся ў Мар’інай Горцы на скаладроме цэнтра турызму дзяцей і моладзі. Тут прайшоў традыцыйны фестываль “Міні-фэст-2017”, які з гэтага года атрымаў статус трэцяга этапу Кубка Рэспублікі Беларусь па спартыўным скалалазанні ў дысцыпліне боулдэрынг.
— Раней на нашым скаладроме праводзіліся толькі спаборніцтвы раённага і абласнога ўзроўняў. “Міні-фэст” аб’ядноўваў вядучых спартсменаў з розных куткоў Беларусі, таму яго новы высокі статус — заканамернасць, — адзначае трэнер Вольга Рак. — Наш скаладром адпавядае ўсім патрабаванням для правядзення топавых турніраў у дысцыпліне боулдэрынг.
Трэці этап Кубка Рэспублікі Беларусь сабраў у Мар’інай Горцы больш за сто спартсменаў. Сярод іх — і вопытныя скалалазы, якія ўваходзяць у дзясятку лепшых спартсменаў краіны. Яны прадстаўлялі Гомель, Бабруйск, Мінск, Віцебск, Полацк і Мар’іну Горку.
У складзе нашай каманды было чатырнаццаць чалавек ва ўзросце ад 11 да 17 гадоў. Значнай увагі на ўзрост звяртаць не трэба, бо ў скалалазанні дзеці часта выступаюць на адным узроўні з дарослымі. Высокі ўзровень падрыхтоўкі пухаўчан ацанілі лепшыя спартсмены краіны. Па словах трэнера, дзеці могуць выступаць на ўзроўні другога дарослага разраду.
Кандыдаты ў майстры спорту, майстры спорту і іншыя спартсмены, поспехі якіх яшчэ наперадзе, спаборнічалі паміж сабой. У кваліфікацыі ім неабходна было пераадолець 25 трас рознага ўзроўню складанасці. Пастаноўкай трас займаўся майстар спорту Андрэй Нікіфаравец.
У фінал па выніках кваліфікацыі выйшлі шэсць мужчын і жанчын. Фіналістаў аддзялялі некалькі сотых балаў. У мужчын п’едэстал атрымаўся без пухаўчан. Першым стаў Мікіта Лагуноў з Гомеля, другім — Максім Нікіфаравец з Мінска, трэцім — Артур Драбінка з Бабруйска. Лепшым у нашай мужчын-скай камандзе стаў пятнаццацігадовы Аляксей Буры (ён на восьмым месцы ў агульным заліку). Гэта добры вынік, бо Аляксей спаборнічаў з кандыдатамі ў майстры спорту.
Пяты год запар пераможцай сярод жанчын стала пухаўчанка Марыя Вернікоўская. Яна адзіная ў фінале прайшла ўсе чатыры трасы. На кожную адводзілася ўсяго па чатыры хвіліны. Разам з нашай чэмпіёнкай на п’едэстал падняліся прадстаўніцы Мінска Кацярына Пагуда і Дар’я Ціткіна. Яшчэ адна пухаўчанка, 11-гадовая Кацярына Ганчарэвіч, трапіла ў дзясятку лепшых.
Спонсарскую дапамогу ў правядзенні спаборніцтва традыцыйна аказала ААТ “Машхарчпрад”.
Кацярына ВЕРНІКОЎСКАЯ.