Сёння — Дзень настаўніка
Якая можа быць у настаўніцкай сям’і традыцыя? Канечне ж, самая любая. Усе залежыць ад самой сям’і, ад цікавасцей яе членаў. Аднак адна агульная традыцыя ва ўсіх настаўніцкіх сем’ях будзе абавязкова: і гэта традыцыя разам адзначаць сваё прафесійнае свята.
Гэтай звычцы ўжо колькі гадоў не здраджваюць дзеці Аляксандра і Таццяны Варывончык. Абавязкова ў першыя кастрычніцкія дні яны прыходзяць да бацькоў, каб павіншаваць іх са святам. І… самім павіншавацца, бо Вольга і Тамара таксама, як і бацькі, выбралі для сябе нялёгкую настаўніцкую дарогу…
Аляксандр Анатольевіч — настаўнік хіміі і біялогіі — больш за 40 гадоў адпрацаваў у школе і мае толькі два запісы ў працоўнай кніжцы (Лешніцкая і Талькаўскія школы). Таццяна Міхайлаўна — настаўніца беларускай мовы і літаратуры — вучыла не толькі дзяцей, але і настаўнікаў, калі са школы перайшла ў раённы аддзел адукацыі.
Як сказаў нехта з унукаў, у такой сям’і дзецям, напэўна, і выбару іншага не было, як ісці ў настаўнікі. Так і адбылося. Спачатку Вольга, вытрымаўшы сур’ёзны конкурс, паступіла ў педагагічны інстытут, а потым і малодшая Тамара вырашыла падтрымаць традыцыю.
Вывучыліся, прыехалі ў родны раён і па сённяшні дзень працуюць у школе. Прычым абедзьве — у Дрычынскай базавай. Вольга — педагогам-псіхолагам, а Тамара — настаўніцай замежнай мовы і намеснікам дырэктара школы. Гаворачы пра цяжкасці прафесіі педагога, Вольга і Тамара прызнаюцца, што ўжо не ўяўляюць свайго жыцця без гэтай працы. Безумоўна, нялёгкая яна, але ці магчыма рэчаіснасць без настаўніка?..
Алена ШАНТЫКА.