Падзякі і падарункі за добрасумленнную працу
Калектыў МТК “Бор” ААТ “Аграсімвал” часта збіраецца разам для вырашэння вытворчых пытанняў. Нагодай для чарговай сустрэчы ў кабінеце начальніка комплекса стала прафсаюзная акцыя “Наш жывёлавод”.
Падзякі і падарункі за добрасумленнную працу старшыня райкама прафсаюза работнікаў АПК Людміла Ленкавец уручыла аператару машыннага даення Антаніне Караткевіч і аператару па вырошчванні цялят Святлане Баёк.
Святлана Уладзіміраўна, дарэчы, дзесяць гадоў працавала даяркай. Яна пастаянна ўдзельнічала ў конкурсах прафесійнага майстэрства, станавілася лепшым аператарам машыннага даення раёна.
У цялятнік жанчына перайшла пяць месяцаў таму. Цяпер тройчы на дзень яна прыходзіць да сваіх гадаванцаў. Выхадныя і святочныя дні не выключэнне. Сярэднясутачныя прывагі ў вазе ў яе групе складаюць больш за 800 грамаў.
—Я даглядаю самых маленькіх цялятак. Зараз іх 57, — расказвае Святлана Баёк. — Праца — нялёгкая: усё даводзіцца рабіць уручную, але спраўляюся. Падарункі — стымул працаваць яшчэ лепш.
Такіж ж стымул з’явіўся ў слесараў малочнатаварнага комплекса Міхаіла Чарнышэвіча і Міхаіла Халадка, якія таксама атрымалі падарункі ад райкама прафсаюза работнікаў АПК.
Павіншаваць жывёлаводаў і яшчэ раз выказаць ім словы падзякі за працу прыехаў таксама дырэктар сельгасарганізацыі Юрый Плешавеня.
Вынікі працы ў галіне жывёлагадоўлі ў гаспадарцы падводзяць штомесяц. Прафсаюзны камітэт адзначае лепшых работнікаў. Увага да людзей — гэтага прынцыпу пры-трымліваецца кіраўніцтва ААТ “Аграсімвал”.
Кацярына ВЕРНІКОЎСКАЯ.