Пераможцаў жніва ўзнагародзяць на раённым свяце “Дажынкі”
Да раённага свята “Дажынкі” рыхтуецца аграгарадок “Голацк”. Прымаць гасцей там будуць 6 кастрычніка.
Нямала намаганняў прыклалі пухавіцкія хлебаробы, каб папоўніць засекі гаспадарак збожжам новага ўраджаю. На-двор’е значна паўплывала на ход і вынікі ўборачнай кампаніі.
Агульны намалот збожжавых і зернебабовых культур (без уліку кукурузы) па раёне сёлета склаў 73166 тон.
Лідарамі па намалоце сярод сельгаспрадпрыемстваў сталі ААТ “Голацк”, “Агра-Абярэг” і СУП “Дукора-Агра”. Гэтыя гаспадаркі атрымалі і самую высокую ўраджайнасць.
Камбайнер ААТ “Зазерка” Міхаіл Булгак.
На працягу ўборачнай кампаніі ў раёне праводзілася спаборніцтва за дасягненне высокіх вынікаў на жніве сярод камбайнераў, вадзіцеляў і аператараў зернесушыльных комплексаў. Больш за 30 камбайнераў сталі тысячнікамі. Больш за дзве тысячы тон намалацілі экіпажы Аляксандра Расолькі і Яўгена Кубры з ААТ “Голацк”, Мікалая і Сяргея Крукоўскіх з СУП “Дукора-Агра”. Сярод маладых камбайнераў лепшымі сталі Міхаіл Булгак з ААТ “Зазерка” і Мікалай Ляпёшка з ААТ “Агра-Абярэг”. Абодва працавалі на КЗС-1218.
Не першы год у ліку лепшых вадзіцеляў Міхаіл Навіцкі з ААТ “Зазерка” і Яўген Кубры з ААТ “Голацк”. Сярод моладзі вызначыліся Яўген Давыдаў з сельгасфіліяла “Дрычын” і Уладзімір Журавель з ААТ “Аграсімвал”.
Падвядуць вынікі жніва і ўзнагародзяць пераможцаў на раённым фестывалі-кірмашы “Дажынкі-2018”.
Кацярына ВІШНЁВА.
