Помнім і ганарымся
Урачыстыя мерапрыемствы ў Дзень Незалежнасці Рэспублікі Беларусь адбыліся ў горадзе Мар’іна Горка на Алеі воінскай славы — гісторыка-культурным комплексе, які адкрылі ў мінулым годзе да 75-годдзя вызвалення Беларусі ад нямецка-фашысцкіх захопнікаў.
Гэта месца за год стала знакавым для гараджан і жыхароў раёна. Тут прайшло нямала важных мерапрыемстваў з удзелам моладзі і ваеннаслужачых. Цяпер стане традыцыяй адзначаць тут і галоўнае свята нашай краіны.
З Днём Незалежнасці і 76-годдзем вызвалення Беларусі ад нямецка-фашысцкіх захопнікаў пухавіччан павіншаваў старшыня райвыканкама Віктар Каляда.
Віктар Міхайлавіч адзначыў, што Дзень Незалежнасці Рэспублікі Беларусь — свята, якое аб’ядноўвае нас у імкненні да міру, згоды і захавання гераічнага летапісу краіны.
Удзельнікаў святочнага мерапрыемства павіншавалі ветэран Вялікай Айчыннай вайны Анатоль Скіталец, першы сакратар раённага камітэта грамадскага аб’яднання “БРСМ” Алена Мазанік.
Кветкі да помніка воінам-дэсантнікам, якія аднымі з першых уступілі ў бой з ворагам і нягледзячы на няроўныя сілы, аказалі супрацьстаянне ворагу і тым самым унеслі свой уклад у разбурэнне плана аб імгненным захопе Савецкага Саюза, усклалі ветэраны, кіраўніцтва раёна, прадстаўнікі прадпрыемстваў і арганізацый Пухавіччыны, моладзь.
У святочнай праграме сёлета няшмат масавых мерапрыемстваў, аднак пасля цырымоніі ускладання кветак адбыўся плац-канцэрт ваеннага аркестра, выступленне якога заўсёды чакаюць і шчыра прымаюць пухавіччане.
Увечары гараджан чакаюць у гарадскім парку імя Любы Гайдучонак, дзе будуць працаваць спартыўныя пляцоўкі, дзіцячыя гульнёвыя зоны. Арганізавана і работа гандлёвых кропак.
На сцэне парка пройдзе канцэрт “З любоўю да цябе, Беларусь!”. І традыцыйна свята завершыцца акцыяй “Спяваем гімн разам”.
Алена ШАНТЫКА.
Здымкі Наталлі ПАРХОМЧЫК.
