У ААТ «Шацк» пабудавалі прафілакторый для цялят
У адкрытым акцыянерным таварыстве «Шацк» завяршылі будаўніцтва прафілакторыя для цялят на МТФ «Міхалевічы». Ён разлічаны на 32 нованароджаных цяляці. Асноўная запаўняльнасць чакаецца ў канцы снежня—у студзені, калі пачнуцца масавыя расцёлы. Пакуль што тут знаходзіцца 7 цялят.
Гэта ўжо другі прафілакторый, які пабудавалі ў гаспадарцы сёлета. Першы — на 48 галоў — раней увялі ў эксплуатацыю на МТФ «Лявонавічы». У ім — драўляныя індывідуальныя хаткі для кожнага цяляці. Даглядчыцай тут працуе Наталля Качан.
— Мы будавалі прафілакторыі гаспадарчым спосабам, — расказаў выконваючы абавязкі дырэктара ААТ «Шацк» Леанід Алізар. — Раней гэта былі памяшканні, якія не выкарыстоўваліся. Сумесна з зааветслужбай раёна было прынята рашэнне пабудаваць прафілакторыі. Наша будаўнічая брыгада за паўтара месяца пабудавала адразу адзін, а затым і другі прафілакторый для цялят. І трэба сказаць, што асноўная задача, якую мы ставілі — павялічыць захаванасць маладняку — выконваецца. Ужо бачны вынік: скараціўся падзеж.
Для будаўніцтва прафілакторыяў былі закуплены толькі расходныя матэрыялы, што дазволіла значна сэканоміць грашовыя сродкі сельгасарганізацыі. Зараз у камфортных умовах утрымліваюцца нованароджаныя цяляты, таксама створаны добрыя ўмовы для працы людзей.
На гэтым будаўніцтва жывёлагадоўчых аб’ектаў у ААТ «Шацк» не заканчваецца: у наступным годзе тут плануюць пабудаваць два «клюшачнікі» для ўтрымання буйной рагатай жывёлы, на 180 галоў кожны.
Анастасія ІЮЛЬСКАЯ.